Cuchara Malavao ba Tu?

Ya puede ya ba tu oi con el expresion chuchara malavao?

Cosa ba quiere decir del cuchara malavao?

Cosa ba ta hace el un gente si ta llama con ele cuchara malavao?

Deverasan lang, dol nunca yo ya puede oi con este expresion del na Zamboanga pa yo ta queda. Aqui ya lang na Manila, del ta trabaja ya yo, amo yo ya puede oi con este expresion estaba na de mio maga uban na trabajo. Mas mayor conmigo el de mio maga uban na oficina por eso ta mira yo maga cuarenta años pa'arriba lang el mayoria del maga gente quien ta usa con este expresion.

Si no conoce ustedes con el expresion cuchara malavao, seguro mas sabe ustedes con el kuchara malabaw o cuchara malabao. Este amo el manera mas comun que ta escribi el maga gente con este expresion na Facebook.

Para puede ustedes mira y entende que modo ta usa el maga gente con este expresion, tiene kita aqui maga ejemplo estaba na Facebook:

“Nungka alsa mano el ombre si hinde una ase sinti duele el mujer. Mira kamo buenamente mga ermano y ermana el video. Si iyo supla, pensa kamo, kosa pasa di inyo ermana? Mga kuchara malabaw kamo. Si man react kamo komo un kriminal yo na di mi mismo kasa. Ase kamo olet, mira kamo kosa pasa.”

“Porke ba se mga kuchara malabaw ta abla man dialysis na Zampen kay manada yo sen? Ay! Man dialysis ba yo na General si manada yo sen? Baka oste el manada sen. Anda ya na Zampen man una...”

“Ese ali mga kuchara malabaw, kosa man kamo ara? Sabe ya todo el kosa gat verdad...”

Bien rabiao gayod sila todo, no?

Base na maga ejemplo arriba, seguro ya puede ya ustedes adivina cosa quiere decir del cuchara malavao. Cuchara malavao amo el ta llama na un gente entremetido quien ta entra-entra na cuento masquin no sabe ele si cosa ta'n cuento el de suyo maga uban.

Na maga ejemplo arriba, ya usa con el expresion cuchara malavao como un adjetivo pero na maga siguiente ejemplo, ay mira kita paquilaya puede tambien usa con este expresion como verbo.

“Tan kuchara malabaw ya tamen mga iru. Suporta gat kunel iru. Lol.”

“Sabe sabe tamen muna si kun kien kel el post... tan kuchara malabaw dayun... timora abla ya tamen kamo na nuay yo respeto.”

“Numas bos man pa kuchara malabao. Porque? Maestro ba bos?”

Como ya puede ustedes observa, ta puede tambien usa como un verbo con el expresion cuchara malavao. Nesecita lang pone 'man' na principio para queda este verbo. Na primer dos ejemplo arriba ya hace junto con el 'ta' y 'man' por eso ya queda este 'tan'.

Pero donde ba estaba este expresion? Para conmigo, estaba este na 'cuchara mal lavado' (cuchara hende enbuenamente ya lava). Pero si deverasan este, debe ba kita escribi con este como 'cuchara mal lavao'? Para conmigo, mucho kanaton ta considera con este como dos palabra lang y hende mas seguro kita conoce con este si hace pa kita con ele tres palabra. Por eso, ya decidi yo escribi con este expresion como 'cuchara malavao'.

Ta existi ba tambien este expresion na Español? Base na de mio pesquisa, dol hende man ta existi este expresion na Español. Posible tambien que estaba este expresion na Portugues. No hay gayod quien sabe.

Tu, cosa tu puede habla? 

Tiene ba tu conoce gente firme cuchara malavao? Tiene ba maga tiempo ta'n cuchara malavao tambien tu?