The Little Prince in Chabacano

(This is a Chabacano translation of Chapter 1 of The Little Prince or Le Petit Prince by Antoine de Saint Exupery)

Una vez, cuando seis años lang yo, tiene yo un libro acerca del vida de maga animal na monte cuando no hay pa alla tanto gente. “Maga Experiencia De Mio” el nombre del libro y ya puede yo alla mira un bien bonito retrato. Un retrato aquel de un grande culebra quien ta traga un animal. Taqui el copia de aquel retrato.
Ya habla na libro: “El maga Boa Constrictor hende ta man usang y ta traga sila entero con el de ila comida. Despues sila come, no puede sila move acabar ta dormi sila seis meses para derreti el comida na de ila estomago.”

Ya pensa yo tarda sobre el maga cosa ta pasa na monte. Despues ya decidi yo usa mio lapiz para hace con el mio primer dibujo. Mi dibujo numero uno. Ansina el suyo hechura:
Ya dale yo mira el mio obra maestra na mio maga mayores, acabar ya pregunta yo kanila si ya tiene ba sila miedo.

Pero ya contesta sila: “Tiene miedo? Por que man kame tiene miedo na sombrero?”

Pero hende aquel sombrero como ta pensa sila. Boa Constrictor aquel quien ta traga un elefante. Pero como no hay entende con el dibujo el mio maga mayores, ya hace yo otro dibujo. Ya dibuja yo el adentro del Boa Constrictor para puede sila entende. Firme gayod ese sila hende ta entende conmigo. Ansina el hechura del segundo dibujo:
Pero ya anda conmigo habla el mio maga mayores que estudia ya lang daw yo Geografia, Historia, Ingles, y Matematica y no mas ya hace maga dibujo del adentro o afuera de maga Boa Constrictor. Por eso, del seis años yo, no hay mas yo pensa queda un famoso pintor algun dia. Ya perde ya yo esperanza por causa del cosa ya habla conmigo el mio maga mayores. No puede gayod ese sila entende si no hay quien kanila enseña. Cansao tambien para na maga bata procura hace kanila entende.

Por eso ya decidi ya lang yo queda un piloto de maga aeroplano. Donde-donde parte del mundo ya yo ya puede llega; y de veras gane kay ya puede gayod yo usa con el mio saber na geografia. Na un mirada lang, ta puede yo habla si China o Arizona el un lugar. Importante sabe el maga ansina cosa  si perde ustedes de noche.

Mucho gente ya yo ya puede conoce quien bien serioso na de ila maga vida. Tarda ya yo ta'n junto na maga adulto. Bien conoce ya gayod yo kanila. Pero hende siempre ta mejora el mio opinion por causa de ila.

Firme gayod yo ta lleva na mio bolsa el mio primer dibujo. Cada vez tiene yo quien ta conoce dol inteligente, ta dale yo con ese gente mira el dibujo. Ay proba yo sabe si ta  puede ba gayod ele entende. Pero firme man 'se sila ta contesta:

“Sombrero ese.”

Acabar hende ya lang yo man cuento con ese gente acerca de maga Boa Constrictor, o el vida del maga animal na monte, o maga estrella. Yo ya lang el procura entende con ele. Man cuento ya lang yo con ele por causa de cen, golf, politica, y maga corbata. Y ta habla yo con ustedes, ay queda gayod 'se sila alegre kay ya puede sila conoce conmigo.