El Influencia del Maga Soldao Español na Chabacano

Malasao

Estofao 

Sarsiao 

Abogao 

Delicao 

Sin tonao 

Champurrao 

Cerrao 

Cosa tu puede observa con estos palabra?

Cuando nuevo lang yo aqui na Manila, cerca ya yo puede habla con el cajero na un restauran kay quiere yo malasao el cocida del huevo na de mio Bangsilog (bangus, sinangag, itlog). Bueno ya lang ya acorda yo kay Chabacano gale el palabra malasao y malasado el propio palabra si na Tagalog. Este incidente amo el cosa ya dale conmigo inspiracion para escribi con este articulo.

Si pensa-pensa kita, mucho maga ansina palabra na Chabacano. Ademas del palabra malasao, tiene tambien kita:

Estofao (Estopado na Tagalog)

Sarciao (Sarsyado na Tagalog)

Abogao (Abugado na Tagalog)

Delicao (Dilikado na Tagalog)

Sin tonao (Sintunado na Tagalog)

Champurrao (Tsampurado na Tagalog)

Cerrao (Sarado na Tagalog)

Como ta puede ustedes mira, no hay perde el letra D na maga palabra Tagalog arriba mientras na Chabacano, hende con ese ta pronuncia. Ta habla sila kay coloquial daw o hende formal este ansina manera de conversada na Español. 

Pero por que gaha na Tagalog, no hay perde el letra D na maga ejemplo arriba? Bungul ba el maga de aton tatarabuelo? Amo ese el ya pregunta conmigo el de mio amiga cuando ya sabe 'le kay na Chabacano ta pronuncia kita como 'tamen' el palabra tambien. Pero ta mira yo hende tambien gaha este por causa lang kay ya'n mal oida el maga gente de antes. Tiene yo ya conoce viejo estaba na un familia que ta conversa Español y si ta conversa ele bien paspas, dol 'tamen' ta sale el de suyo 'tambien'.

Proba kita investiga mas con este asunto.

Na un estudio acerca el Chabacano de M. Parkvall y B. Jacobs (The Genesis of Chavacano Revisited and Solved), ya habla sila alla kay otro-otro clase daw el maga gente quien ya man influencia con el Tagalog y Chabacano. Asegun kanila, maga misionario o maga padre daw el ya man influencia con el Tagalog y kanila estaba el maga palabra español na Tagalog. Mucho na maga gente quien ta queda padre estaba na maga rico familia y bien educao.

Mientras tanto, maga soldao Español daw el ya man influencia con el Chabacano. Ansina daw ta'n cuento (aquel ta perde el letra D na maga palabra ta acaba con -ADO) el maga soldao Español aquel maga tiempo (aca quince y aca dieciseis siglo) aqui na Filipinas kay manada kanila estaba na maga pobre familia y hende educao.

Ya habla pa kanda M. Parkvall y B. Jacobs, maga criminal daw el maga soldao Español na Filipinas aquel tiempo (siglo quince y siglo dieciseis). Deverasan gaha este? Igual ba el Zamboanga antes como na Australia donde ta envia maga criminal estaba na Britania?

Ta envia ba para na Zamboanga con el maga criminal como castigo kanila aquel maga tiempo? Si ta puede ustedes acorda, hende ba ya lleva con Jose Rizal na Dapitan, Zamboanga del Norte del ya aresta con ele?

Por que gaha? Seguro por causa bien lejos el Zamboanga na capital del pais y aquel maga tiempo, bien monte pa gayod gaha el Zamboanga. Pero masquin hasta ahora, mucho lang siempre ta pensa kay bien monte el Zamboanga masquin un rato lang man puede monta aeroplano estaba Manila para Zamboanga. Por eso seguro del maga año pasao, ya 'caba envia na Zamboanga todo'l maga pulis envuelto na droga.

Tu? Ta cree ba tu con este? Cosa tu puede habla con el teoria ya presenta kanda M. Parkvall y B. Jacobs?